Rev 16 | KZE | STEP | minkákémbá isááwánda monoꞋ-náúmpákémbá moóráwai minávákáéténárawatavena anónkaꞋa séna avakaeté-taavepinkemba Áánútu áwááꞋo tíyín-tantaaꞋa marapáꞋá ayáúsuwaaro súwana

Revelation of John 16

Áánútu áwááꞋa tíkain-kwasai.

1 minkákémbá isááwánda monoꞋ-náúmpákémbá moóráwai minávákáéténárawatavena anónkaꞋa séna avakaeté-taavepinkemba Áánútu áwááꞋo tíyín-tantaaꞋa marapáꞋá ayáúsuwaaro súwana 2 minávákáéténárawapinkemba aivakéwáí kwená táávepinkemba marapáꞋá ayáúsuwowasa anón-avaa-kwankona aúvái tineꞋá agaimakésa kwenáúwawakaaniꞋo úmárówaina imáyáa mósá makáawaitopaꞋa anón-karevutomba túwawaapimpaꞋa kówana títe uráiye.

3 úwana kwenánaaembo máyowai kwená táávepinkemba uwí-nómpáꞋá ayáúsuwowana uwí-nónkó púwín-kwaasigona naaeráámbá úwana uwí-nómpínkén-kwámbá putásaraiye.

4 putásowana minkáéꞋnárai tínaaembo máyowai kwená táávepinkemba nonayumpinkáꞋá ayáúsuwowana naae-nómbá aúkúwaꞋa 5 minkákémbá isááwánda kwíyómpaken-kwayoꞋnaꞋa nonkáꞋá kárákwirowai séna

emá kawer-úramba umái máyaandawai aivaꞋá mé ívékwaraꞋa máyaandawai misáwí-méyámbó tímakaanda kaweꞋá umái arupí uráane.

6 ená kwaásiye enáái simátímakaawaiye tínkamuwasa pukáantavai naae-nómbá aútínkaraane. mindáyavai kaweꞋá kwée miwítí sáwí-mayaigona anondá tímakaane nonkáꞋá kárákwirowai súwaꞋa 7 isááwánda moóráwai póímo tuvúꞋmáímo agáyáan-ontan-taareirakemba séna Áánútu Ísóigo amápar-asirayamba tokáandawai misáwí-méyámbó tímakaanda kaweꞋá umái arupí uráane siráiye. 8 súwana minkáúmbónárau tínaaembo máyowai kwená táávepinkemba aaváúráꞋá ayáúsuwowana Áánútu érankowana kwaási tineꞋó iramó kaintembá aaꞋá kéna tinepáí óꞋoraumai kówana 9 títe úwasa Áánútumba simái sáwíꞋa umánkesa Áánútunopakemba misáwí-méyámbá kwétiye sumbánivo miwítí sáwí-mayai íma tuwésa ÁánútunopaꞋa tésa kwená ááimba óꞋoran-aaimban-iye íma siráawe.

10 íma suwaná minéíyáíndárau tínaaembo máyowai kwená táávepinkemba anón-avaa-kwanko kwaásiraꞋa kawáá urópaꞋa ayáúsuwowana túnkuwasa kwemá kawáá urówai tuní-áyámpáꞋá mésa títe kwéuwasa kwááꞋa kwétesa timááví túwááyaandei kwéunkaresa 11 títe kwéuwana karevúꞋa kwégontavai Áánútumba kwíyómpakewaimba simái sáwíꞋa umánkómbanivo íma sáwí-mayai tuwésa kwenópaꞋa tiráawe.

12 íma tuwaná minéváꞋááséínárawa tínaaembo máyowai kwená táávepinkemba anón-donko áwíꞋa Yúvérétísi-nonkaꞋa ayáúsuwowana mindómbá káꞋnáguwasa aaváúmó usón-ayampaꞋ-marapimpaꞋa kawáá urówaiti aambá kwíyúntavena mindómbá kaꞋnáguraiye.

13 mindómbá káꞋnáguwaꞋa awánaawanda arááínkó óipinkemba awáímá túwana anón-avaa-kwanko óipinkemba awáímá túwana kampar-áímbó simátímakowai óipinkemba awáímá túwasa minkáúmbó-áwáígó tirumpimbá kaumbo-táráváá-kwámbá mésa óꞋon-oꞋom-bayai ímo awánarom-bayai kwémaesa Áánútuwemo ááiꞋo tíyénesa amápaꞋ-maravaꞋa kwénaaesa kawáá-kwáásí tíꞋmaesa Áánútu amápar-asirayamba tokáiwaina anón-kanaama ááiꞋo tíyénesa tiráawe. 15 kemá Yóni simátimeꞋa séꞋa Ísu séna umóyán-kwáásímó timbó ímo ísaraawanamo tintembá íma ísarenkaꞋa kúmónda simuꞋmarésa unáánkwátói úmaresa máyaiyawai íma unáánkwátói-iyaaintavesa tigaemá ónááowe Ísu siráiye kemá Yóni súne. awánaawaanda 16 minkákémbá kawáá-kwáásí tíꞋmaesa moórá-ayampaꞋa máúpaꞋa Yútaa-kwaasi tááivinkemba Ípíru-aimpinkemba Áámágétoni-maravare kwésesa torupamái méraawe.

17 máyówana mináváꞋmóráénárawa tínaaembo máyowai kwená táávepinkemba úndámo torópaꞋa ayáúsuwowana moóráwai monoꞋ-náúmpáꞋá kawááin-avarakemba anónkaꞋa séna amápaꞋ-mayai ánásagwiye súwana 18 kwíyónaai kwésuwana awairái kwésuwana tawáomba kwéuwana anóm-barima téna marapáꞋá kwaási máyónkakene ívékwaraꞋo máyáankare mirám-bárímá íma kwétena 19 anón-daopaꞋa kaumboráꞋá maramá kítíraaꞋa uréna tawákaaꞋa úwana amápaꞋ-maravaꞋa anón-daopimpaꞋa tawisínaawisi úwana Áánútu Pépíróni-anon-daopaken-kwaasi sáwíꞋa umbá Áánútu imáyáa éna áwááꞋa tiyéna miwítí sáwí-meyamba anómba timúwana 20 nonavuvumpaꞋ-márámá amápaꞋa nawíkasuwowana omátomba arúwáásé umágúwana 21 kwíyómpakemba anón-umbai tain-óntánkáámbá kaaíyaramba kuména kwaási tínkamuwasa Áánútumba simái sáwíꞋa umánkaraawe. anón-kaaiyaramba anómba sáwí-meyamba timúntavesa Áánútumba simái sáwíꞋa umánkaraawe.